Me Mutu Tātou/Let's All Quit - te reo Māori content

Me Mutu Tātou/Let's All Quit - te reo Māori content

HE Code: 
HE2383
Language: 
Also available in: 
Format: 
Booklet A5
Publication date: 
21 June 2012
Order free copies:
Bilingual resource in te reo Māori and in English to support Māori smokers to quit smoking.

NOTE: The printed version of this resource contains both Māori and English text. The online content below is in te reo Māori only; click here to view the online English content.

Mā mātou koe e awhi

He mate warawara kino te kai paipa, he uaua te whakamutu. Kei te pai, e mārama ana mātou, ā, kei konei mātou ki te āwhina, ki te tautoko i a koe. Kia kaha, ka taea tonutia e koe!

Waea:

Waea mai ki Quitline 0800 778 778 – he kōrero ārahi ā mātou hei āwhina i a koe ki te haukoti i tō kai paipa.

Quitline 0800 778 778

Txt2Quit:

Me tūhono atu ki Txt2Quit. Ina pērā, ka rere utukore atu ki tō waea ētahi whakaaro pai hei āwhina i a koe ki te whakamutu i te kai paipa.

Haere ki www.quit.org.nz, ki reira rēhita ai.

Tatauranga whakamutu:

I konei ka tātaihia ōu ake tatauranga Me Mutu, kia kite ai koe i te nui o te moni ka penapenahia e koe i tō kore e kai paipa.

Heoi anō, me rēhita, i www.quit.org.nz

Rangitaki whakamutu:

 

Mā konei koe kuhu atu ai i te whānau rangitaki. Ka tautokona koe e ētahi atu e wawata ana kia mutu tā rātou kai paipa.

Me rēhita anō, i www.quit.org.nz/blog

He whakapiri, he pia ngaugnau, he rare paratupeka:

 

Tīkina mai tētahi o ēnei mō te $5 noa iho – whakamutua te momi hikareti, kātahi anō ka pēnei te ngāwari o te utu.

Rēhita mai i www.quit.org.nz, waea mai rānei ki 0800 778 778.

He Mahere Whakamutu:

Hangaia tāu ake Mahere Whakamutu hei āwhina i a koe i ō mahi ki te whakamutu i te momi hikareti. Whāia ngā tohutohu i te ipurangi, kōrero ki te kaitohutohu i te waea rānei.

Rēhita mai i www.quit.org.nz, waea mai rānei ki 0800 778 778.

Kanohi ki te kanohi: Mō ngā āwhina kanohi ki te kanohi, tēnā koa whakapā atu ki tō tākuta, ki te kaituku ratonga hauora o tō rohe, ki a Aukati KaiPaipa rānei – www.aukati.co.nz
He mea piripono te aukati kai paipa ki aua taonga e kaingākautia ana e tātou katoa o Aotearoa – arā te hauora, te noho ora, me ngā whānau. He piriponotanga tēnei ki tētahi oranga hauora, me te aukaha e taea ai ngā mahi pārekareka ki waho, ki te taha o ngā whānau me ngā hoa tata. He mea kaingākau anō tēnei mō ngā wā kei mua, ki ā tātou tamariki, me ā tātou mokopuna. Tokomaha rawa atu ngā tamariki o Aotearoa, kua kapohia wawe ō rātou mātua, ō rātou tīpuna, me ō rātou whānau hoki. Me whakatau ki te aukati i tēnei rā tonu – e tata tonu ngā āwhina kei runga waea.

Rūtene Tianara Te Hōnore Tika Tā Jerry Mateparae

Kāwana Tianara o Aotearoa

Kairangi, The Quit Group

Ehara taku toa i te toa takitahi, engari he toa takitini

Ko te whakamutu i te kai paipa, he mahi mā te tangata takitahi, engari inā te tokomaha e haere ana i tō taha, e kore ai koe e mokemoke. Mā Quitline tonu koe e tautoko, mā roto i tana ratonga kōrero i te waea, i te ipurangi. Arā anō a Aukati KaiPaipa, he ratonga kanohi ki te kanohi e tū ana i te nuinga o ngā hapori. He āta mahi tahi ēnei rōpū e rua ki te āwhina i a koe i roto i tō whawhai rangatira kia tū tupeka kore koe.

He taru tawhiti – waiho ki tawhiti

He tapu te hā ki te Māori. Nā Tāne i ahuahu mai te wahine tuatahi, a Hineahuone, nāna anō i whāngai atu te hā ki roto i a ia, me te taki anō i tēnei karakia onamata:

Tihei mauri ora

Ki te whaiao

Ki te ao mārama!

He puiaki tonu te hā. Ko tēnei mea te hongi, he whakawhitinga o te hā o te tokorua. Kia momia te hikareti, he nui ake i te 4000 ngā matū kino e urutomo ana, e patu ana i te tinana.

He tini whetū ki te rangi*

He huna tonu tā te kai paipa i ēnei āhuatanga e whā, e kore ai e kitea ngā whetū e kānapanapa ana, e tauhikohiko ana.

Mauriora (Te tuakiri ā-iwi)

Ehara nō te ao Māori taketake ake tēnei mea te kai paipa, engari e 800 ngā Māori e mate ana i te kai paipa i ia tau. He kaumātua te tokomaha, ngā kaipupuri i ngā kōrero tuki iho.

Te oranga (Te tūāpapa hauora)

Ki te mutu tō kai paipa, ka nui ake tō kaha, ka tūhauora ake, ā, kua pai tō kawe ake i te maha atu o ngā mahi e pārekareka ana.

Waiora (Te taiao)

I tua atu i te takakino i te tinana, ka noho roa mai anō hoki ngā paitini o roto i te auahi ki ngā kākahu, ki ngā hanga o roto i te whare, ki ngā waka, ki te hau e ora ai te tangata, ōna hoa, me tōna whānau katoa atu.

Toiora (Te noho hauora)

Ka māmā noa ake te kawe i ngā mahi pērā i te kapa haka, i te waka ama, i te hīkoikoi, i te oma, tae atu anō hoki ki te whakahā noa iho, ki te kore e haere te kai hikareti i te taha.

He wero nō mai rā anō

Nō mua noa atu i te putanga o ngā tohu whakatūturu i te mate atu o te tangata i te kai paipa, tērā tētahi rangatira o Te Arawa, o Ngāti Rangitihi i kite i ōna kino. Ko Raureti Mokonui-ā-rangi te ingoa o te tangata nei, ā, i te tau 1883 ka titoa e ia te haka nei e kōrero ana i ngā kino o te kai paipa:

Ko te kōrero, ko te aha?

Ko te whakaatu, ko te aha? Turi! Pōturi! Nei anō ngā rore mōu

Turi! Pōturi! He wairangi nōu

Kua takoto te mānuka

He hīkoi kia mutu ai

1. Whakatauria te rā e mutu ai

Whiriwhiria he wā e iti ana ngā pōkaikaha, ngā taumahatanga i runga i a koe.

2. Kia mārama koe ki ngā take

  • Te utu – Ki te pau i a koe he pākete kotahi i ia rā, e $6000 tēnā ka pau i te tau, ka mutu ka piki haere tēnā utu. Kāore e kore he mea whaihua ake, pārekareka ake e taea ana e koe te hoko ki tēnā nui o te moni.
  • Ngā tamariki, mokopuna – E whitu whakareatanga te kaha ake o te tūpono tīmata o tētahi tamaiti ki te kai paipa me he kai paipa tētahi o ōna mātua. Ki te mutu tāu nā kai paipa, kātahi nā te tauira pai ki ō tamariki.
  • Te hauora – Ko ngā kamupene hoko tupeka anake te hunga hoko taonga ki te iwi e mate ai te tangata ki te tika tana whai i ngā tohutohu a te kaihanga mō te whakamahi i taua taonga. Heoi anō, ko te rongopai, ina mutu tō kai paipa, ka tīmata tonu atu i konā te whakaora ake a tō tinana i a ia.
  • Te whānau me ngā hoa – Ahakoa kāore anō pea kia mutu tāu nā kai paipa, ka taea e koe te āwhina ētahi atu kua mutu tā rātou kai paipa. Ā, kia mutu tāu momi, kua pai tō tautoko i ētahi atu – ka noho pea koe hei taringa whakarongo, ā, ki te inoihia koe, kua pai tō tāpae whakaaro hei ārahi. He tautoko tahi, he manaaki tahi – koinā te kaupapa.

3. Ko ngā mea tērā e raru ai koe

  • Te matenui ki te paratupeka – Mā ngā whakapiri, ngā pia ngaungau me ngā rare e āwhina ki te pēhi i te matenui.
  • Ō ritenga – He kai paipa koe i muri i te kai, i a koe e kai waipiro ana, i a koe e inu kawhe ana rānei? Whakarārangitia mai ētahi atu mahi ka taea i ēnei wā, i tua atu i te momi hikareti.
  • Ō kare ā-roto – Kia tau te pōuri, te pōkaikaha, te hōhā ki te tangata, kua tahuri pea ki te hikareti hei whakamaheatanga. He aha ētahi mahi kē atu ka taea?

4. Ko ngā whakapiri, ngā pia ngaungau me ngā rare

Ka pūruatia te tūpono ū tonu koe ki tō mahi aukati ki te whakamahia ēnei hanga. E $5 noa iho te utu o tēnā. Waea mai ki Quitline 0800 778 778, tonoa rānei i te www.quit.org.nz

5. Kia pūmau te kore e kai paipa

Tērā tonu pea ka pupū ake te hiakai nui ki te kai paipa, i ētahi tau tonu pea i muri i tō pare atu i ngā paipa ki rahaki. He āhuatanga māori tēnei – ehara i te tohu kua hinga koe, kua toa ko te hikareti. Heoi anō, anei he mahi hei TĀMI i tō hiahia ki te momi paipa:

  • Takaroa – Me takaroa, kaua e huri tika atu ki te kai paipa. Kaua e huakina te pākete, kaua e tākiritia te māti. Kia pau ētahi meneti torutoru nei, ka iti haere tō hiahia ki te hikareti.
  • Āta whakahā – Āta kapohia te hau takiwā, āta tukuna anō tō hā. Kia toru ēnei whakahā roa.
  • Mahia he mahi kē atu – Me whakarongo pea ki te puoro, ka haere rānei ki te hīkoikoi haere, ka waea atu rānei ki tētahi hoa. Kimihia he mahi e kore ai e wātea ō ringaringa.
  • Inumia he wai māori – Āta inumia te wai māori kia iti nei. Puritia ki tō waha, kia rongo ai koe i te reka, i te hāhā o te wai.

Ko koe te tino rangatira o tōu ake tinana

Ina whakarērea atu e koe ētahi mahi hē o mua, ka pakari ake tō tū, tō whakahaere i a koe anō. Arā hoki ētahi e mea ana kua hōhā rātou i te noho hei pononga nā te tupeka, hei mauhere nā te kai paipa. Ina mutu te momi, ka ora ake, ka hauora ake koe. Ka whakahīhī koe ki a koe anō, ā, ka kaha ake te āhei ōu ki te kawe ake i ētahi atu mahi uaua.

Te matahoki

Mō te nuinga o te hunga ka mahi ki te aukati i tā rātou kai paipa, me neke atu i te whakamātauranga kotahi e tutuki ai. Ki te tūpono hoki anō koe ki te kai hikareti, anei ētahi whakaaro hei āwhina i a koe ki te haukoti anō i tēnei mahi:

  • Pātaihia te pātai, ‘He matahoki rangitahi noa iho tēnei?’ Ehara hoki i te mea ko te kainga o te hikareti kotahi, e tohu ana kua tangata kai paipa tūturu anō koe. Nō reira, kia kaua e riro koinā he take e hoki tūturu anō ai koe ki te kai paipa māu.
  • He aha i toro anō ai tō ringa ki te hikareti? Ko tētahi atu tangata kai paipa? I pā he raru whawhati tata ki a koe? I pōhēhē koe kāore he hē o te hikareti kotahi nei? I tere rawa rānei tō whakamutu i te mau whakapiri, i te kai pia ngaungau, rare rānei?
  • Ki te matahoki koe, me kimi āwhina. Kei te mōhio ngā ratonga pērā i Quitline, i te Aukati KaiPaipa he pēhea rawa te uaua o te haukoti i te kai paipa, mā rātou koe e āwhina. Ahakoa kua tono āwhina pea koe i a rātou i mua atu, kei te pai, kei reira tonu rātou ki te tautoko i a koe.
  • Me whakapono koe ki a koe anō. Āe, he mahi uaua te aukati i te kai paipa, engari kua tutuki i a koe ētahi atu mahi uaua i mua atu i tēnei.
  • Kia tere tonu tō kimi ara whakatika.
  • He iti pea te ‘hikareti kotahi’, engari he nui te utu.

Te kimi āwhina

  • Waea mai ki Quitline 0800 778 778, ka haere rānei ki www.quit.org.nz
  • Haere ki tō tākuta, ki te whare whakaora rānei.
  • He ratonga kanohi ki te kanohi tā Aukati KaiPaipa, he whakapiri, he pia ngaungau anō e tukuna ana e rātou: www.aukati.org.nz
Ka hinga, ka tū, ka ora! 

Nā Ahorangi Tā Mason Durie tēnei tauira o te hauora Māori i āta tātai, e whai ana i te hanga o Māhutonga

ISBN 978-0478-19369-5 (print)
ISBN 978-0-478-19370-1 (online)