Talking with Your Teenager/Rangatahi about Safer Sex – te reo Māori version

Talking with Your Teenager/Rangatahi about Safer Sex – te reo Māori version

HE Code: 
HE1704
Language: 
Also available in: 
Format: 
Pamphlet A5
Publication date: 
1 June 2004
Revision date: 
1 May 2012
Status: Hard copies currently out of stock.
Information in te reo Māori about condom use and safe sexual practices. For parents and caregivers to discuss with teenagers.

Te Kōrero ki ō Tamariki/Rangatahi mō te ai haumaru

He mahi whakaoko mauri, he mahi whai hua te whakatupu taiohi mā te matua. Engari i ētahi wa he pīkauranga nui kei roto. Ako ai tō tamaiti taitamariki i te mātakitaki ki a koe. I ētahi wā ako ai ia mā te whakamātautau tikanga hou, mā te whakatata atu ki te raruraru. I ētahi wā ka māharahara pea koe mehemea he tika te huarahi e takahia ana e tō taitamariki, kei te tōtika rānei ōna hoa. Arā, kei kawea ō tamariki ki ngā huarahi hē e aua hoa. Me āta tohutohu rānei koe i a rātou kia kaua e moe tahi me tētahi atu, me nohopuku rānei koe i runga i te whakapono he mōhio rātou ki te whakaaro?

Kei tēnei mātārere ētahi kupu tohutohu me pēhea e tīmataria ai he kōrero ki tō taitamariki mō te ai haumaru, te ārai hapū me ngā whakapokenga taihemahema, tukuna ai ki te hoa moe mā te ai (STI). He uaua pea te kōrero ki ō taitamariki mō te ai haumaru, engari he mea nui kia kōrero koe ki a rātou. Kei te mōhio mātou ko ngā tairamariki kōrerorero ai ki ō rātou mātua mō te ai haumaru, he kakama kē atu ki te whai i ngā huarahi haumaru, ā, he mōhio ki te tiaki i rātou anō.

Ngā STI – ngā kōrero pono

  • Ko ngā whakapokenga taihemahema, tukuna ai ki te hoa moe mā te ai (STI’s), kei te piki haere i waenganui i te hunga taitamariki, arā, te chlamydia, te mate paipai, me te pānga o te Whakaruhi Ārai Mate HIV ki te tangata.
  • I Aotearoa, kei runga kē atu te pāpātanga o ngā STI i tērā kei te kitea i Ahiteiria me Ingarangi.
  • Ka matapā, arā, ka pākoko pea koe i ngā STI, (arā, kāre e taea te whānau tamariki), ka pāngia pea e ngā whakararu i waenga, i muri hoki i te hapūtanga.
  • I ētahi wā ka mamae, ka kitea he māturunga para, ka ngāoko rānei, ka toto rānei. I ētahi wā kare kau he tohu, kāore rānei e mōhiotia kei reira.
  • Engari e kore e pērā rawa ki te whakamahia he pūkoro ure ki te ai.

He Pātai me ngā Whakautu

Tokohia ngā taitamariki kei te ai i enei rā?

Kei te mōhio mātou he tini ngā taitamariki o Aotearoa kei te ai. I tētahi rangahau i kitea 20 ōrau o ngā ākonga kura tuarua kei te ai i ēnei rā, ki ētahi atu, 14 ki te 15 ōrau o ngā taitamariki 30 ki te 40 tau, kei te ai tangata kē i ēnei rā.

Ki te kōrero au ki aku taitamariki mō te whakamahi pūkoro ure, ka kaha ake rātou ki te kimi hoa mō te ai?

Kāo, ki te kōrero koe ki ō taitamariki mo te whakamahi pūkoro ure, me te ai, e kore rātou e kaha ake ki te kimi hoa mō te ai. Engari, e mōhiotia ana mā reira ka kaha ake rātou ki te whakamahi pūkoro rātou ina tīmata ki te moe i tētahi hoa. Ko te hua o ngā pūkoro ure he ārai atu i ngā hapūtanga ohorere me ngā STI.

He aha i whakaarotia ai he mea nui kia kōrero ngā mātua ki ā rātou taitamariki mō te ai haumaru?

He wāhi tino nui tā ngā mātua, ki te ako i te rangatahi mō te orange hōkakatanga. Kei te mōhio mātou ka riro mai ngā kōrero i a rātou i ētahi atu wāhi. I tētahi tiro whānui i Aotearoa i te tau 2001 ko te kura te puna matua o ngā kōrero mō te hauora hōkakatanga mā ngā tamariki kura, i muri ko ngā hoa, i muri ko ngā mātua, ngā mōheni, ngā pukapuka me te pouaka whakaata.

Āe, kāo rānei, kei te tika te kī, ki te kore e āta rongoātia tētahi STI ka noho matapā koe, e kore koe e kaha ki te whānau pēpi?

Āe – ki te kore e rongoātia ngā whakapokenga ka pāngia pea te tangata e ngā mate kakā o te kōpū, me te pākoko (te korenga e taea te whānau tamariki). I ētahi wā ka pāngia te pēpi e ngā whakapokenga i tōna whānautanga mai.

Tō mahi ki te āwhina i tō taitamariki ki te tiaki i a ia anō

Me matapaki i ngā take whānui i te taha

Ahakoa e tika ana kia mōhio ā tātou taitamariki/rangatahi ki ngā kōrero pono mō ngā STI me ngā tikanga mō te ai haumaru, e tika ana kia mōhio rātou he mea nui hoki kia haere tahi me te moe i te hoa te aroha, te manaaki tangata me ngā haepapa mō te tangata. Mā te āta kōrerorero ki ō taitamariki mō te wāhanga ki te wairua i roto i te ai, ka pai ake tā ratou hanga tikanga mō tā rātou whakapiri atu ki te tangata kē.

Te titiro matawhānui

He tini ngā tohutohu e rangona nei e te rangatahi o nāianei me pēhea tā rātou kawe i tō rātou hōkakatanga, mai i te hunga pāpāho, i te ao o te rangatahi, i ō rātou hoa, i ō rātou whānau, i ngā Hāhi, i ngā waiata, i te aha, i te aha. Ko ēnei kupu tohutohu he whakaoho mauri, he kawe whakaaro, he tinihanga i te tangata. He taupatupatu ngā kōrero, he whakapōhēhē i te tangata i ētahi wā. Ko te tikanga pai ia, kia noho ko tōu reo te reo whai whakaaro, ā, kia nui ō kōrero papai mō te kaupapa.

E tika ana kia wātea rātou ki te whiriwhiri tikanga mō te ai me te hōkakatanga, me ngā mea e tika ana, ki ō ratou whakaaro, i mua rawa i te moe i tētahi hoa. Kei te pai kia kī atu ‘kāo’ ki te ai. E tika ana hoki kia whai pūkenga rātou e taea ai te kī ‘kāo’, mehemea koinā tō rātou hiahia. Me mātua mōhio rātou ki te tiaki i a rātou anō, ki te ai rātou ki te tangata kē.

Kia poto ngā kupu tohutohu, kia mārama tonu

Mā te whakamahi pūkoro ure mō te ai, ka āraia atu pea te hapūtanga, me ngā whakapokenga pēnei i te chlamydia, i te mate paipai, me te Whakaruhi Ārai Mate HIV. Tērā pea ka hua ake ko ngā whakararu i te hapūtanga, ka matapā rānei te tangata, i ngā whakapokenga kāore e rongoātia.

Kia taea ai te tinana te tiaki, he mea nui kia tika te whakamahi pūkoro ure, ā, me whakamahi pūkoro i ngā ainga katoa a te tangata.

Hoatu ētahi atu kōrero.

Tērā ētahi rauemi mō te ai, mo te hōkakatanga hoki, he mea āta tuhituhi mārire mā te taitamariki. Kei ēnei ētahi atu kōrero mō ngā STI me te ai haumaru. Whakawāteatia ēnei rauemi – hei tautoko i ō kupu tohutohu.

Whakapā atu ki tō Pouāwhina Taihema, ki tō Ratonga Ora Taihema rānei. Kei te Family Planning/Tiaki tō Whakapapa, ētahi rauemi papai tonu mā te rangatahi me ngā mātua, inā rā:

Ngā  Mātua - Māhorahora, Korero Pono – he mātarere mā ngā whānau mo te kōrerorero ki ngā tamariki mō te ai me te hōkakatanga.

Your Choice – He pukupuka mā ngā taiohi mō ngā whiringa mō te hōkakatanga, mō ngā piringa ki tētahi hoa, te tarukino me te waipiro.

Ētahi atu kōrero:

Kia maumahara, he māmā noa iho te kupu tika ki tō taitamariki: Mehemea kei te ai ki te tangata kē me whakamahi pūkoro ure rātou – i ngā wā katoa.